மகிழம்பூச்சரம்

வாடினாலும் வாசம் மாறாத எண்ணங்களின் வண்ணச்சரங்கள்......

நண்பர்கள்

 அனைவருக்கும் பொங்கல் நல் வாழ்த்துக்கள். 





 எங்கும் மகிழ்ச்சி பொங்க... 
        இல்லத்தில் நலமும் வளமும் பொங்க... 
             உள்ளம் என்றும் நிறைந்திருக்க.. 
                   உலகம் ஒளி பெற..    
அல்லதை அழிக்கும் சூரியனின் கதிர்கள் பரவுவதுபோல  
நல்லதை வாழ்விக்கும் நம் எண்ணங்கள் எங்கும் பரவட்டும்.  



       

அடுத்ததாக நெறிசார் போராட்டம் மற்றறும் நெறிசார் இரண்டக நிலை (ethical dilemma) பற்றி பார்க்கலாம். இதுமுற்றிலும் உணர்வுசார் போராட்டமாக இருக்காது.

                                                                                                                                                                                                                                                                                                                                                  
 நம்முடைய ஒவ்வொரு செயலுக்கும் பின்னனியில் இயல்பாகவே ஒரு நெறிமுறை வழிகாட்டுதல் இருக்கும். அந்த வழிகாட்டுதலின்படி நாம் முடிவெடுத்து செயல்படும்போது முழு மன திருப்தி கிட்டும்.  இதயபூர்வமாக என்ற வார்த்தையின் பின்விளைவு உடல் மற்றும் மனதின் ஆரோக்கியம்.  திருக்குறள் போன்ற  நீதி நெறி நூல்கள் நாம் நெறிமுறைப்படி வாழ வழி காட்டுகின்றன.  நாடோடிகளாக திரிந்த மனித இனம் ஒரு சமூகமாக அடையாளம் காணப்பட்டபோது எளியாருக்கு வலியோர் தீங்கு விளைவிக்காமல் நடந்து கொள்வதற்காக இவை ஏற்படுத்தப்பட்டன.  இந்த நெறிமுறைகள் - Ethics எப்போதும் பொதுவான  பின்புலத்தை சார்ந்ததாகவே இருக்கும். பல கிளை வாய்ப்புகளை கொண்டதாகவும் இருக்கும். உதாரணமாக,  உயிர் கொல்லாமை பொதுவான  நெறிமுறை. ஆனால் இது யுத்தகளத்தில் செல்லாது. உயிரை காப்பாற்றும் தற்காப்பு நடவடிக்கைகளில் இது அநீதியாக கருதப்படாது.

 நம்மை வழி நடத்தும் மற்றொரு விசயம், நாம் கடைபிடிக்கும் தர்மமாகும் (dharma). தர்மம் என்பது கடமை என்று கொள்ள வேண்டும். ‘என் குடும்பத்தின் நலன் என்னுடைய தர்மமாக இருக்கலாம். என்னுடைய முடிவுகள் அனைத்தும் இதனை கருத்தில் கொண்டே எடுக்கப்படும். சில சமயம் நான் பின்பற்றும் தர்மம் அறநெறியிலிருந்து பிறழ வாய்ப்பளிக்கும். அந்த சமயத்தில் நான் சார்ந்த சமூகத்தின் நெறிமுறைகள்- Ethics – எனக்கு வழிகாட்டும்’. ‘.  ‘ஈன்றாள் பசி காண்பான் ஆயினும்….’ என்ற குறளில் சொல்லப்படும் நியதி இதுதான். பெற்ற தாயை பேணிக்காப்பது ஒரு மகனின் கடமையென்றாலும், அதற்காக அவன்  நெறிதவறிய வழியில் பொருளீட்டக்கூடாது – கொலை,கொள்ளை, சூது போன்றவை கூடாது.

சில சந்தர்ப்பங்களில் நம்முன் வைக்கப்படும் பல்வகையான தீர்வுகளில் ஏதேனும் ஒன்றினை தேர்வு செய்ய முற்படும்போது நாம் இந்த நெறிமுறைகளை பின்பற்றியே செயல்படுவோம் - சாலைகளில் செல்லும்போது சாலைபாதுகாப்பு விதிகளை பின்பற்றி செல்வதுபோல். மிக சில சமயங்களில் நம்முன் உள்ள தீர்வுகள் சமமான தார்மீக பலம் கொண்டவையாக இருக்கும். முடிவெடுக்க முடியாமல் குழம்பி நிற்போம் நாம் பின்பற்றும் தர்மத்திற்கும் பொதுவான நெறிமுறைகளுக்கும் இடையே வரும் சிக்கலே  நெறிசார் போராட்டம் ethical conflict எனப்படும். 

கணவனை இழந்து ஆதரவற்ற நிலையில் இருக்கும் அவள் ஒரு கூலித்தொழிலாளி. ஒரு வயது குழந்தையான ஒரு மகன் மட்டும் உண்டு.  சில நாட்களாக சரியாக வேலை கிடைக்கவில்லை. இருவருமே சரிவர உண்ணவில்லை. உயிர் போகும் அபாயத்தில் இருவருமே உள்ளனர். பழைய கஞ்சி பாத்திரத்தில் நீரில் மிதக்கும் கைப்பிடி அளவு சோறு மட்டுமே உள்ளது. இருவரில் ஒருவருக்கு மட்டுமே போதும். மற்றவர் உணவு இல்லாமல் மரணத்தை தழுவ நேரிடலாம். இந்த நிலையில் யாருக்கு அதனை தரலாம்? அந்தப்பெண் அதனை உண்டு உயிர் வாழட்டும் என்ற முடிவினை அவளாலேயே ஒப்புக் கொள்ள முடியாது. குழந்தைக்கு தந்து தாய் உயிர் துறக்கட்டும் என்றாலும் சரியான தீர்வாக இருக்காது. இதுதான்  இரண்டக நிலை.  ஒரு முடிவிற்கு வரவேண்டுமல்லவா, அதனால் இன்னும் ஒரு செய்தியை சேர்த்துக் கொள்ளலாம். அவளுக்கு அன்று பார்த்து ஒரு வேலை கிடைக்கிறது. உணவு உட்கொண்டால் மட்டுமே அதனை செய்ய முடியும். இந்த நிலையில் அவள் அந்த உணவினை எடுத்துக் கொள்ள அனுமதிக்கலாமா? ஏனெனில் குழந்தைக்கும் உணவு கிட்டும் வாய்ப்பு கிட்டலாம். அல்லது அவள் கைக்கு பணம் கிட்டும் முன் பசியால் குழந்தை உயிர் துறக்கவும் நேரிடலாம். இது எழுத்தாளர் சமுத்திரம் அவர்களின் சிறுகதையில் வரும் ஒரு சூழ்நிலை. இது போன்ற குழப்பங்களுக்கு பதில் சொல்லாமல் அவர் தரும் முடிவுயாதெனில், மீதிருந்த கஞ்சியை அவள் குடித்துவிட்டு பசியால் கதறிழும் குழந்தையை தூக்கிக் கொண்டு வேலைக்கு விரைகிறாள், இந்த முடிவு தரும் கேள்விகள் நமக்குள் பல பதில்களை தந்தாலும் தவறு நடந்ததுபோன்ற உணர்வினை தருகிறதல்லவா? எந்த முடிவினை தேர்ந்தெடுத்தலும் குற்ற உணர்வால் பாதிக்கப்படுவது உறுதி. இதுவே நெறிசார் இரண்டக நிலை ethical dilemma  எனப்படுகிறது.

  நெறிசார் இரண்டக நிலையின் பின்விளைவு, செய்த தவறினை நினைத்து வருந்தும் நிலையாகும். இதன் அடிப்படை தர்ம நெறி தவறுதல் மற்றும் அதன் விளைவான உணர்வுகளின் பாதிப்புகள் – பெரும்பாலும் குற்ற உணர்வு முக்கிய பங்கு வகிக்கும். மனம் தவறுக்கான தண்டனை ஏற்பதை விரும்பும்.  முற்றிலும் நெறிசார் போராட்டமாக இல்லாமல் உணர்ச்சிகளின் தாக்குதலும் இருக்கும். தவறுக்கு சரியான பிராயசித்தம் தேடாமல் தப்பிக்க நினைக்கும் மனப்பான்மை வரும். தப்பிக்கும் வழியாக தற்கொலை முடிவினை எடுக்க நேரிடலாம்.

  இத்தகைய போராட்டத்தில் உள்ளவர்கள், உணர்ச்சிவசப்பட்டு முடிவெடுக்கும் வாய்ப்பு மிகக் குறைவு. எனவே இத்தகைய நிலை தற்கொலை முடிவிற்கு உடனேயே கொண்டு செல்லாது. பொதுவாக, தர்ம வழியில் தாம் நடப்பதாக நம்புபவர்களுக்கு தன்னை பற்றி உயர்வான எண்ணம் – high self esteem-  இருக்கும். சிக்கலான சில தருணங்களில் தர்மத்தை மீறும் நிலை ஏற்படும்போது தங்களை பற்றிய உருவகம் உடைந்து போவதை உள்ளுக்குள்ளேயே உணர்வார்கள். இதுதான் குழப்பத்தின் ஆரம்பமாக இருக்கும். தர்மம் தவறிவிட்டோம் என்ற குற்ற உணர்விற்கு ஆளானால் தவறான முடிவிற்கு செல்ல வாய்ப்புள்ளது. அது மிக உறுதியான எண்ணமாகவும் இருக்கும். எனவே சாதாரண உரையாடல்கள் இங்கு பலன் தராது. மருத்துவர்களின் உதவியுடன் கவுன்சிலிங் செய்யப்பட வேண்டும். 

உதாரணமாக மகாபாரத்தில், பீஷ்மரை மரணப்படுக்கையில் பார்க்கும்போது அர்சுனனின் குற்ற உணர்வு அதிகரிக்கும். அவருடைய நிலைக்கு தானே காரணம் என்று ஒப்புக் கொண்டு தற்கொலைக்கு முயல்வான். அப்போது ஸ்ரீ கிருஷ்ணர் குறுக்கிட்டு தற்கொலைக்கு சமமான செயலை செய்து இந்த பாவத்திலிருந்து விடுதலை பெறலாம் என்று அறிவுறுத்துவார். அவர் சொல்லும் வழி, தன்னைத்தானே புகழ்ந்து கொள்ளுதல்.  தற்புகழ்ச்சி தற்கொலைக்கு சமம் என்பார்கள். ஆனால், மனோவியல்படி தர்ம நெறியிலிருக்கும் ஒருவன் தன்னை பற்றிய உயர்வான எண்ணம் கொள்ளும்போது குற்ற உணர்விலிருந்து விடுபட முடியும். ஏனெனில், தன்னெஞ்சறிவது பொய்யற்க என்பதன்படி முழு மனதோடு ஒருவன் தன்னை பற்றிய உயர்வான கருத்துக்களை சொல்லவேண்டும் எனில் உண்மையான உள்ளார்ந்த தேடுதல் தேவைப்படும். அது தன்னம்பிக்கையினை அதிகரிக்கும்  சில நல்ல விவரங்களைக்கூட தரக்கூடும்.

தர்ம நெறியினை பின்பற்றுபவர்கள் சட்டென உணர்ச்சி வசப்படமாட்டார்கள். ஆனால் தவறிழைத்துவிட்டால் ஏற்படும் குற்ற உணர்வு நீண்ட காலத்திற்கு நீடித்திருக்கும். ‘கரையான் அரிப்பதுபோல’ என்பார்களே... அதுபோல்  நம்முடைய எண்ணங்களை பாதிக்கும். சரிவர கையாளப்படாத  நெறிசார் போராட்டமானது,
-      நம்மைபற்றிய சுய மதிப்பீட்டை குறைத்து நம் நம்பிக்கைகளை மாற்றக்கூடும். – Low self esteem.
-     நெறிமுறைகளை பின்பற்ற முடியாமல் தவறான பாதைக்கு செல்ல நேரிடலாம் -  Ethical fading.
-    சில சமயங்களில் மனச்சிதைவிற்கு ஆளாகலாம்.

குற்ற உணர்விலிருந்து வெளிவர சரியான வழிகாட்டுதல்கள் தேவை – இரு கோடுகள் தத்துவம் போன்றவை.


 நாம் பார்க்கும் வெளி உலகத்தைவிட நமக்குள் இருக்கும் அகஉலகம் மிக பெரியது. மிக ஆழமானது. மிக அதிகமான தத்துவங்களும் தார்மீக கோட்பாடுகளும் அங்கு இருக்கும். மறைத்தலோ மறத்தலோ இல்லாத உலகம். அங்கு பிறக்கும் ஒவ்வொரு கேள்விக்கும் நாம் பதில் சொல்லியே ஆகவேண்டும். ‘தன் செயல் எண்ணி தவிப்பது ‘ தவிர்க்க முடியாது. நாம் பின்பற்றும் நெறிமுறைகளும் அதற்கான தேர்வுகளும் முக்கியத்துவம் பெற்றவை. முழுவதுமாக ஒரடிகூட வைக்காமல் பாதியடி பதித்து தாவிச்செல்லும் இந்த விரைந்த உலகத்தில் நம் உள்ளுணர்வை பாதிக்கும் செயல்களிருந்து தப்பிக்க நாம் பின்பற்றும் தர்மம் மற்றும் நெறிமுறைகள் பற்றிய தெளிவு இருக்க வேண்டியது அவசியம். அதற்கான சூழலை அமைத்துக் கொள்வதையும் கவனம் செலுத்த வேண்டும்.  

(  To read the articles related with Ethical conflicts please refer the articles published by Max H. Bazerman and Ann E. Tenbrunsel in Harvard Magazine.)

பகுதி இரண்டிற்கு செல்ல இங்கே சொடுக்கவும்..

           போன பதிவில் இடம்பெற்றிருந்த படத்தில் மஞ்சள் வர்ண கோடுகள் ஆலோசனை பிணைப்பினையும் கருநீல வண்ண கோடுகள் அறிவுரை தருவதையும் குறிக்கிறது. அறிவுரை சரியான வழிகாட்டலை பரிந்துரைக்கும். ஆலோசனை என்பது ஒருவரை கைபிடித்து வழி நடத்திச்செல்வது போன்றது இலக்கை அடையும்வரை நம் கவனம் அவர்மேல் இருக்க வேண்டும். அதற்கு மிகுந்த நேரமும் இதயபூர்வமான பங்களிப்பும் இருக்க வேண்டும். அதனால்தான் நம்முடைய உணர்வுசூழ் உலகத்தினரை சிறிய எண்ணிக்கையில் அமைத்துகொள்ள வேண்டும். அந்த படத்தில் A,B,C அனைவருமே ஒரே  குடும்பத்தை சேர்ந்தவர்கள்தான். ஆனால் கையாள எளிதாக இருக்க வேண்டும் என்பதால் மூன்று வட்டத்தில் பிரித்துள்ளேன்.

        இதிலிருந்து ஒரு விஷயத்தை புரிந்து கொள்ள வேண்டும்.  நம்மைச் சேர்ந்தவர்களை பாதுகாக்கும் நல்ல எண்ணம் நம்மிடம் இருக்குமெனில் அவர்களுடைய மனதின் எண்ண ஓட்டங்களையும் உணர்வுகளையும் நாம் பூரணமாக தெரிந்திருக்க வேண்டும். அதற்குரிய சந்தர்ப்பங்களைஅவ்வப்போது அமைத்துக் கொள்ளுங்கள். அவர்களுக்கு சிக்கல் ஏற்படும் தருணத்தில் கட்டுப்பாட்டிற்கு கொண்டுவர நமக்கு கை கொடுக்கும். என்னதான் திறமைசாலியாக அனுபவசாலியாக இருந்தாலும், படகினை தயார் செய்து வைத்திருப்பவரால் மட்டுமே வெள்ளம் பெருகும் நிலையில் படகினை பாதுகாப்பாக செலுத்த முடியும், மற்றவர்களை காப்பாற்றவும் முடியும்.

இனி நம்முடைய உணர்வுசூழ் உலகத்தை பாதிக்கும் எதிர்மறை மனக்காரணிகளை வகைபடுத்தி பார்க்கலாம். அப்போதுதான் சரியான வழிகளை கையாள முடியும் அவற்றை மூன்று வகையாக பிரிக்கலாம். உணர்வுசார் மனபோராட்டம்-EMOTIONAL CONFLICT, நெறிசார் மனப்போராட்டம்- ETHICAL CONFLICT,  நெறிசார் இரண்டக நிலை - ETHICAL DILEMMA.  (இவை அனைத்துமே மனோவியல் ஆராய்ச்சிகளில் இருக்கும் புதிய வார்த்தைகள் எனவே தமிழாக்கம் என்னுடைய முயற்சி).  அனைத்து விதமான உளவியல் பிரச்சினைகளுக்கும் இவையே அடிப்படை. இனி விரிவாக காண்போம்.


உணர்வுசார் மனபோராட்டம்-EMOTIONAL CONFLICT

     இதன் அடிப்படையானது முரண்பாடான உணர்வுகளின் மோதல் ஆகும். முரண்பட்ட உணர்வுகளின் தாக்கத்தால் கட்டுப்பாடிழந்த நிலை. ஒன்று எதிரியை அழிக்க நினைக்கும் அல்லது தன்னை அழித்துக் கொள்ள நினைக்கும். மிக முக்கியமாக தன்னை பற்றிய சிந்தனையே மேலோங்கி நிற்கும். எந்த ஒரு விசயத்தையும் உள்வாங்கும்போது அதனை புரிந்துக் கொள்ளும் முறைதான் நமக்குள் ஏற்படும் உணர்வுகளும் அதன் வெளிப்பாடுகளும்.  உணர்வுகளை இரண்டு தூண்டுதல்கள் ஏற்படுத்துகின்றன. அவை சுயம்சார்ந்த தேவைகள்(wantself), கடமைசார்ந்த தேவைகள் (shouldself) ஆகும். உதாரணமாக, முக்கியமான அலுவலகத் தேர்விற்கான கேள்வித்தாள் உங்கள் கையில் தேர்விற்கு முதல் நாளே கிட்டிவிடுகிறது. நீங்கள் என்ன செய்வீர்கள் சுயம் சார்ந்த முடிவு எனில் அதனை பயன்படுத்திக் கொள்வீர்கள். கடமை சார்ந்த முடிவு எனில் உரிய அதிகாரிகளின் கவனத்திற்கு கொண்டு செல்வீர்கள். விருப்பங்களானது சுயம் சார்ந்த முடிவினையும், நெறி முறைகளானது கடமை சார்ந்த முடிவினையும் தருகின்றன.

     மிக அதிகமான தற்கொலை சம்பவங்கள் மற்றும் முயற்சிகளுக்கு இந்த எதிர்மறை காரணியே அடிப்படையாகிறது. குறிப்பிட்ட சூழ்நிலையில் சிக்கலுக்கு தீர்வானது,நம் விருப்பத்திற்கு எதிரானதாக (Conflict of interest) இருந்தால் மனப்போராட்டம் அதிகரிக்கும். எண்ண ஓட்டத்தினையையும் சிந்தனையையும் மிக விரைவாக பாதிக்கும். கடந்துபோன தோல்விகளை நினைவூட்டி தடுமாற வைக்கும் இனி அவ்வளவுதான் என்று இயலாமையை நம் மனதில் பதிக்கும். சில சமயம் ஆற்றாமையின் விளைவாக கோபத்தை அதிகரித்து, பழிவாங்கும் உணர்வை தூண்டும். அதிலும் எதிராளி தர்ம நியாயத்திற்கு கட்டுப்பட்டவன் அல்லது பழிக்கு பயந்தவன் என்றால், தற்கொலை முடிவை எடுக்க வைக்கும். தன்னுடைய மரணத்தால் எதிரி மனநிம்மதியிழந்து தவிப்பது போன்ற கற்பனை காட்சிகள் தோன்றி, வக்கிரத்தன்மையினை  அதிகரிக்க வைத்து உறுதியான முடிவிற்கு வழிதேடும். சரியான வழிக்காட்டுதல் இல்லையெனில் சுயபரிதாபமும் பச்சாதாபமும் அதிகரித்து தவறான முடிவிற்கு தள்ளிவிடும். இது போன்ற நிலையில் மரணத்தின் எல்லைவரை செல்லும் வரை தனக்கு நடக்கப்போகும் பாதிப்புகளை அறிய முடியாத மாயை உருவாகிவிடும். கடைசி நொடியில் தன்னை காப்பாற்றுமாறு கதறும் சம்பவங்கள் இப்படித்தான் நடக்கிறது ஒருவேளை அவர்கள் காப்பாற்றப்பட்டாலும் அதன் தாக்கம் நீண்ட  நாட்கள் அவர்களிடம் இருக்கும் சிலசமயம் உடல் உறுப்புகள் பாதிக்கப்படுவதும் நடப்பது உண்டு.

 இது போன்ற நிலையில் நம் உணர்வுசூழ் உலகத்தினர் இருப்பதை நாம் புரிந்து கொள்ள வேண்டும். முகபாவனைகள், நடத்தைகள் காட்டிக் கொடுத்துவிடும்.அவ்வாறெனில்,
1. அன்பும் கனிவும் கொண்டு விசாரியுங்கள். மற்ற வேலைகளை ஒதுக்கி வைத்துவிட்டு மிக முக்கியமான விசயமாக கையிலெடுங்கள்.

2. ஒருவர் உணர்வுகளின் திடீர் தாக்குதலில் உள்ளார் எனில் அது மூளையையோ, இதயத்தையோ அல்லது வயிற்றில் அமில சுரப்பையோ அதிகரிக்கும் முதல் இரண்டு விசயத்தில் மயக்கமடைவதும், நெஞ்சு வலிப்பதும் ஏற்படலாம். அப்போது மரணபயம் தானாகவே தோன்றிவிடும். அந்த சூழ்நிலையிலிருந்து தன்னை விடுவித்துக் கொள்ளும் முயற்சி தானாகவே தொடங்கிவிடும். எனவே கோபம், வேதனை, கலக்கம் போன்ற உணர்வுகள் கட்டுப்பாட்டிற்கு வந்துவிடும்.

3. ஆனால், வயிற்றில் அமில சுரப்பு அதிகரித்தால், தொடர்ந்து எதிர்மறை எண்ணங்கள் தோன்றிக் கொண்டே இருக்கும். எனவே முதலில் இதனை சரி செய்ய வேண்டும். ஜில்லென்று குடிக்கக்கூடிய பக்குவத்தில் சாத்துக்குடி( நன்கு பழுத்தது) சாறு இனிப்பு சற்று அதிகம் சேர்த்து தரலாம். குளிர்ந்த பால் தரலாம் ரொம்பவும் சூடாக இல்லாமல் சாக்லேட் கலந்த பானம் (Health drinks) தரலாம். காபி, போதை பானங்கள், கார்ப்னேட்டட் குளிர் பானங்கள், மசாலா அதிகம் சேர்த்த உணவு வகைகளை தவிர்க்கவும். ஏனெனில் இவை அமிலசுரப்பினை அதிகரிக்கக்கூடியவை

4. இதன்பின் அவர்கள் உடலளவில் நிதானத்திற்கு வருவதை கண்கூடாக பார்க்கலாம்.  நல்ல காற்றோட்டமான இடத்திற்கு கொண்டு சென்று அமைதியாக இருங்கள். அவராக உரையாடலை தொடர வாய்ப்புள்ளது. அவர் பேசும்போது குறுக்கிட்டாமல், முழு மனதுடன் கவனமாக கேளுங்கள்.

5.  நீங்கள் பேசும்போது, தயவு செய்து அவர்களின் தவறினை சுட்டிக்காட்டாதீர்கள். அதற்கு உகந்த நேரம் இதுவல்ல. அவர்கள் உணர்வுசார் மனப்போராட்டத்தில் இருந்தார்களெனில், மற்றவர்களின் வாழ்க்கையில் அவர் எவ்வளவு முக்கியத்துவம் பெற்றிருக்கிறார் என்று சொல்லுங்கள்.

6. அவரின் சிறப்புகளை எடுத்தியம்பி புகழவும் வேண்டாம் ஏனெனில் தற்கொலை முடிவு என்பது தன்னுடைய தகுதிக்கு ஏற்ற நிலை கிட்டவில்லை, மறுக்கப்பட்டது என்ற ஆதங்கத்தின் விளைவாகவும் இருக்கும். பெரும்பாலும் அவர்கள் தன்னை பற்றிய உயர்வான அபிப்ராயம்(High self esteem) உள்ளவர்களாகவே இருப்பார்கள்.

7. அவர் நிறைவேற்ற வேண்டிய கடமைகளை நினைவுபடுத்துங்கள். வாழ்ந்து ஜெயிப்பதன் முக்கியத்துவத்தை உணர்த்துங்கள். இடமாற்றம் செய்வது மிக நல்லது. எதிர்மறை காரணிகளிலிருந்தும் தோல்வியின் தாக்கத்திலிருந்தும் வெளிக்கொணரும்.

8.   குறிப்பிட்ட மனநிலையிலிருந்து அந்த நொடி அவரை வெளிக் கொணர்வதே மிக முக்கியம் பிறகு அவர் நிதானத்திற்கு வந்த பின் சுயமாக நல்ல படியாக சிந்திக்க ஆரம்பித்துவிடுவார்.

9.        சூழ்நிலையினை (if needed) அனுசரித்து Counslingற்கு ஏற்பாடு செய்யுங்கள்.

10. தங்களுடைய உலகினை முற்றிலும் வேறொரு கோணத்திலிருந்து புதிய பார்வையில் பார்க்க உதவுங்கள். 


உதாரணங்கள் – காதல் தோல்வி, தேர்வு தோல்வி, தொழில் நஷ்டம்,  – ஏனெனில், இவையனைத்தும் மற்றவர்களால்  தமக்கு நேர்ந்தவைகளாக எண்ணிக் கொள்வர். தராசு தட்டு  இந்த விசயத்தில் எதிரி பக்கம் சாயாது.


இன்னும் தொடரும்...